Пацвярджэннем сапраўднай веры ва ўкрыжаванага Хрыста з’яўляецца дар з самога сябе – любоў да бліжняга, асабліва да таго, хто яе не годны, хто пакутуе і маргіналізаваны, адзначае Папа Францішак у пасланні на Сусветны дзень хворых. Пасланне было апублікавана 7 снежня.

6 снежня Папа Францішак прыняў на аўдыенцыі Вярхоўнага камісара ААН па справах бежанцаў Антоніо Гутэрэса. Была абмеркавана цяжкая гуманітарная сітуацыя ў Сірыі і ініцыятывы, неабходныя для падтрымкі суседніх дзяржаў, якія прынялі больш за 2 мільёны бежанцаў з гэтай краіны.

“Св. Францішак і рэформа Касцёла шляхам святасці” — такой была тэма першай адвэнтавай медытацыі, якую прапаведнік Папскага Дома а. Раньера Канталамеса прапанаваў Папу Францішку і яго супрацоўнікам 6 снежня. Медытацыі будуць адбывацца кожную пятніцу Адвэнту.

Папа Францішак моліцца за тое, каб прыклад Нэльсана Мандэлы, памерлага 6 снежня 2013 г., натхняў «новыя пакаленні палітыкаў Паўднёва-Афрыканскай Рэспублікі ставіць справядлівасць і агульнае дабро ў авангардзе сваіх палітычных памкненняў».

“Да Божага Нараджэння разам са св. Францішкам Асізскім” – тэма медытацый, якія прапаведнік Папскага Дома а. Раньера Канталамеса прапануе Папу Францішку і яго супрацоўнікам у кожную з пятніц Адвэнту. Першая прагучыць у Апостальскім палацы 6 снежня.

Папа Францішак вырашыў заснаваць спецыяльную Камісію па абароне дзяцей, каб даручыць ёй абавязак клопату Апостальскай Сталіцы аб ахове непаўналетніх і душпастырскай увазе да ахвяраў злоўжыванняў. Пра гэта паведаміў 5 снежня арцыбіскуп Бостанскі кардынал Шон Патрык О’Мэлі.

На заканчэнне агульнай аўдыенцыі 4 снежня Папа Францішак заклікаў маліцца ў інтэнцыі пяці праваслаўных манахінь, выкрадзеных баевікамі ў Сірыі. 2 снежня тэрарысты напалі на праваслаўны манастыр св. Тэклы ў мястэчку Маалула недалёка ад Дамаска.

2 снежня Папа Францішак прыняў на аўдыенцыі Біньяміна Нетаньяху, прэм’ер-міністра Дзяржавы Ізраіль. Палітык сустрэўся таксама з Дзяржаўным Сакратаром Яго Святасці арцыбіскупам Пьетро Паралінам.

1 снежня Папа Францішак наведаў рымскую парафію Святога Кірыла Александрыйскага. Пантыфік удзяліў дзевяці падлеткам сакрамэнт канфірмацыі, сустрэўся з хворымі і новаахрышчанымі і паспавядаў некалькіх вернікаў.

30 лістапада Папа Францішак узначаліў малітву Нешпараў з удзелам студэнтаў рымскіх універсітэтаў. Пантыфік пажадаў удзельнікам малітвы, каб “абавязак хадзіць у веры і паводзіць сябе ў адпаведнасці з Евангеллем” суправаджаў іх у час Адвэнту.

Святы Айцец 30 лістапада сустрэўся з вернікамі Антыяхійскай Грэка-Мелькіцкай Царквы, якія прыбылі ў Рым з пілігрымкай. Папа звярнуў увагу на неабходнасць прымірэння на Блізкім Усходзе і перш за ўсё ў Сірыі і заклікаў пілігрымаў маліцца ў гэтай інтэнцыі, бо толькі малітва можа спыніць усе акты насілля і стаць на шлях дыялогу.

Папа Францішак мае намер прысвяціць 2015 год у Касцёле кансэкраванаму жыццю. Пра гэта Пантыфік сказаў 29 лістапада падчас сустрэчы з удзельнікамі пасяджэння Саюзу генеральных настаяцеляў мужчынскіх ордэнаў.

Брат Алоіз быў прыняты Папам Францішкам у Ватыкане. Гэта была першая прыватная аўдыенцыя прыёра супольнасці Тэзэ ў новага Папы. Папа Францішак запэўніў пра сваю глыбокую павагу да Брата Ражэ, заснавальніка cупольнасці Тэзэ, і заклікаў cупольнасць для працягу свайго годнага шляху.

Не баяцца сведчыць аб уласных перакананнях і рэлігійнай прыналежнасці заклікаў Папа Францішак удзельнікаў пленарнага пасяджэння Папскай рады па міжрэлігійным дыялогу, якое праходзіць 25-28 лістапада ў Рыме на тэму “Члены розных рэлігійных традыцый у грамадстве”. Святы Айцец прыняў іх на аўдыенцыі.

30 лістапада Папа Францішак правядзе адвэнтавыя Нешпары і сустрэнецца са студэнцкай моладдзю ў Вечным горадзе. Пра гэта паведамляе вікарыят Рыма.