Увечары 18 снежня 2011 г. у касцёле св. апостала Андрэя ў Слоніме адбылася адарацыя, прысвечаная ўшанаванню памяці бл. Яна Паўла II. Моладзь і старэйшыя парафіяне сабраліся, каб разам славіць Бога спевам і разважаць над тэкстамі з прамоваў і гамілій благаслаўлёнага Пантыфіка: «Не бойцеся, адчыніце, адчыніце шырока дзверы Хрысту і Яго збаўчай уладзе!»

Падчас адарацыі малітоўную цішыню прасякваў сваёю глыбінёю заклік Яна Паўла ІІ: «Sursum corda» — «Угору сэрцы».

«Ведаеце, гэта нейкі цуд, — кажа ўдзельніца малітвы, 80-гадовая бабуля. — Раней я і не ведала, што значыць адарацыя, трохі чула ад унукаў, але сёння я прыняла ўдзел у гэтай супольнай малітве. І вось толькі ў гэтыя гады пачынаеш цаніць кожную хвіліну свайго жыцця. Хачу падзякаваць усім тым, хто перажыў разам са мною гэтыя радасныя гадзіны».

У сярэдзіне адарацыі неспадзявана і вельмі сімвалічна ў касцёл прыбыў Бэтлеемскі агонь.

Там, дзе ёсць больш за два чалавекі, там ёсць Бог. Вельмі прыемна, што мы, слонімская моладзь, нягледзячы на тое, што ў нас столькі спраў, столькі клопатаў, змаглі разам дзякаваць Богу за сведчанне веры гэтага вялікага чалавека.

«Любоў навяртае сэрца і дорыць супакой чалавеку, які часам здаецца згубленым, атакаваным сіламі зла, эгаізму і боязі». «Падчас адарацыі мы прамаўлялі сваю малітву праслаўлення і, дзякуй Богу, пасля малітвы лёталі, нібы матылі, хацелася спяваць, дзякаваць Богу за тое, што ў нас ёсць дзе маліцца, ёсць што піць, чым дыхаць, за тое, што мы і ёсць будучыня свету, надзея Касцёла і, самае галоўнае, Яго надзея!» — кажа моладзь.