У нядзелю Найсвяцейшай Тройцы, 3 чэрвеня 2012 г., у касцёле святых Апосталаў Пятра і Паўла ў Іўі адбыліся святарскія прыміцыі ксяндза Вадзіма Уса TChr. Варта адзначыць, што святар з’яўляецца ўжо чацвёртым хрыстусоўцам, які паходзіць з гэтай парафіі.

Пасля заканчэння фармацыі і вучобы ў Вышэйшай духоўнaй семінарыі ксяндзоў хрыстусоўцаў 22 мая 2012 г. Вадзім Ус прыняў святарскае пасвячэнне ў архікатэдральнай базыліцы ў Познані (Польшча) з рук біскупа Здзіслава Фартуняка.

Ксёндз Вадзім Ус цэлебраваў прыміцыйную святую Імшу ў дзень свайго нараджэння і дзяліўся з вернікамі, роднымі і шматлікімі сябрамі радасцю дару святарства. Гэтая падзея стала вялікай урачыстасцю для ўсёй парафіі. Святарскія прыміцыі кс. Уса прыгожа ўпісаліся ў юбілей 20-годдзя душпастырскай працы хрыстусоўцаў у Беларусі, а таксама 80-годдзя існавання Таварыства Хрыста для палякаў эмігрантаў.

Гамілію падчас літургіі прамовіў пробашч парафіі Святога Уладзіслава ў Суботніках ксёндз Францішак Гаўдысь TChr. На заканчэнне святой Імшы новапрэзбітэр удзяліў усім прысутным прыміцыйнае благаслаўленне і падарыў памятныя абразікі, на якіх змешчаны словы: «Езус Хрыстус учора і сёння той самы, дый навекі» (Гбр 13,8). Гэтую праўду ксёндз Вадзім Ус панясе ўсім, каго спаткае на сваім святарскім шляху.