16 студзеня 2010 г. Святы Айцец Бэнэдыкт XVI быў удастоены звання ганаровага грамадзяніна старэйшага баварскага горада Фрайзінг (Германія), з якім напрацягу шматлікіх гадоў было цесна звязана жыццё Ёзафа Ратцынгера.

15 студзеня 2010 г. Святы Айцец Бэнэдыкт XVI удзяліў аўдыенцыю ўдзельнікам пленарнага пасяджэння Кангрэгацыі Веравучэння. Падчас сустрэчы Папа адзначыў, што у цэнтры задач гэтага ведамства павінны быць клопат аб хрысціянскай еднасці і адказ на выклікі біяэтыкі. Таксама Пантыфік заклікаў да прыняцця лефеўрыстаў у паўнату камуніі Касцёла і падкрэсліў, што рашэнне аб стварэнні персанальных ардынарыятаў для былых англіканаў не ідзе ў супярэчнасці з экуменізмам.

29 сакавіка 2010 г., у панядзелак Вялікага тыдня, Святы Айцец Бэнэдыкт XVI будзе цэлебраваць святую Імшу з нагоды 5-годдзя смерці папы Яна Паўла ІІ. Аб гэтым паведамляе апублікаваны 15 студзеня ў Апостальскай Сталіцы каляндар цырымоній з удзелам Святога Айца з лютага па красавік гг.

14 студзеня 2010 г. Святы Айцец Бэнэдыкт XVI удзяліў традыцыйную аўдыенцыю для бурмістра Рыма і ўладаў рымскай правінцыі і рэгіёна Лацыя, якая адбываецца ў студзені кожнага года. Падчас сустрэчы Папа нагадаў, што кіраўнікі грамадскіх арганізацый павінны дбаць пра агульнае дабро, і заахвоціў субяседнікаў да захавання «здаровай раўнавагі», пры якой «рашэнні і планы будуць прымацца з клопатам аб усіх грамадзянах, забяспечваючы агульны дабрабыт».

13 студзеня 2010 г. Святы Айцец Бэнэдыкт XVI удзяліў аўдыенцыю Сюзане Маёла, якая стала віноўніцай каляднага інцыдэнту ў Апостальскай Сталіцы. Варта нагадаць, што 24 снежня 2009 г. падчас святой Імшы пастэркі ў базыліцы святога Пятра 25-гадовая швейцарка, пераадолеўшы загароджанні ў святыні, падбегла да Папы. Ахова палічыла гэта нападам на Пантыфіка.

11 студзеня 2010 г. Святы Айцец Бэнэдыкт XVI удзяліў аўдыенцыю прадстаўнікам дыпламатычнага корпусу, акрэдытаванага пры Апостальскай Сталіцы. Падчас сустрэчы Папа выказаўся аб шанаванні «чалавечай экалогіі» як ключы да пабудовы міру ў свеце, а таксама аб неабходнасці прызнання публічнай ролі Касцёла і пазітыўным удзеле свецкіх людзей у падтрыманні і паглыбленні міру і салідарнасці. Сёння Ватыкан падтрымлівае дыпламатычныя адносіны са 178 краінамі свету.

9 студзеня 2010 г., з нагоды завяршэння святкавання 150-гадовага юбілею Папскай Паўночнаамерыканскай калегіі, Святы Айцец Бэнэдыкт XVI сустрэўся з сённяшнімі і былымі навучэнцамі гэтай установы. Са сценаў Папскай Паўночнаамерыканскай калегіі за гады яе дзейнасці выйшлі больш за 5 тысяч святароў.

7 студзеня 2010 г. Святы Айцец Бэнэдыкт XVI удзяліў аўдыенцыю новаму паслу Турцыі пры Апостальскай Сталіцы Кенану Гарсою. Звяртаючыся да новага пасла, Пантыфік адзначыў, што Ватыкан высока ацэньвае дзейнасць Турцыі ў справе ўсталявання міру і стабільнасці на Блізкім Усходзе. Абедзве дзяржавы падтрымліваюць дыпламатычныя адносіны ўжо амаль 50 год.

Больш за 2 мільёны вернікаў з усяго свету прымалі ўдзел у 2009 г. у папскіх аўдыенцыях і святых Імшах, якія цэлебраваў Святы Айцец Бэнэдыкт XVI у Апостальскай Сталіцы і Кастэль Гандольфа (прыгарад Рыма). Прэфектура папскага дому дала статыстычныя даныя адносна ўдзелу вернікаў у сустрэчах з Пантыфікам за мінулы год, не лічачы падарожжаў Папы па Італіі і ў іншыя краіны.

У нядзелю 27 снежня 2009 г. падчас абеду ў рымскай сталоўцы, наладжанай дзякуючы працы дабрачыннай Супольнасці св. Ідзія, Святы Айцец Бэнэдыкт XVI сустрэўся з самымі беднымі жыхарамі Рыма, якія з’яўляюцца часткай вялікай сям’і Касцёла і атрымліваюць дапамогу ад гэтай дабрачыннай каталіцкай арганізацыі. Падчас абеду, які па традыцыі арганізоўваецца для рымскіх жабракоў у калядны перыяд, Пантыфік павіншаваў са святамі Божага Нараджэння больш за 200 сваіх субяседнікаў.

18 снежня 2009 г. Святы Айцец Бэнэдыкт XVI удзяліў аўдыенцыю дэлегацыі Каталіцкага Касцёла з Валоніі (рэгіён Бельгіі). Падчас сустрэчы Папа абяцаў маліцца ў інтэнцыі жыццяздольнасці Касцёла ў гэтым краі. Варта адзначыць, што з Валоніі паходзіць елка, якая ў гэтым годзе была ўсталявана на плошчы Святога Пятра ў Апостальскай Сталіцы.

Рэлігія павінна быць фактарам супакою, а не канфлікту, — такой была асноўная думка Бэнэдыкта XVI падчас сустрэчы Папы з васьмю новымі пасламі, якакя адбылася 17 снежня 2009 г. На супольнай аўдыенцыі Пантыфік прыняў прадстаўнікоў Кеніі, Судана, Уганды, Даніі, Фінляндыі, Літвы, Казахстана і Бангладэш, якія склалі Папу даверныя граматы.

11 снежня 2009 г. Святы Айцец Бэнэдыкт XVI удзяліў аўдыенцыю Прэзідэнту В’етнама Нгуeн Мінь Чыета. У гэты ж дзень Пантыфік сустрэўся з прадстаўнікамі епіскапату Ірландыі.

Святы Айцец Бэнэдыкт XVI заахвоціў праваслаўных вернікаў Албаніі да супольнага вызнавання веры разам з католікамі. 4 снежня 2009 г. Папа ўдзяліў аўдыенцыю архіепіскапу Тыранскаму і ўсёй Албаніі Анастасію.

З снежня 2009 г. Святы Айцец Бэнэдыкт XVI удзяліў аўдыенцыю Прэзідэнту Расіі Дзмітрыю Мядзведзеву. У гэты ж дзень расійскі лідэр у межах свайго візіту ў Ватыкан сустрэўся з Дзяржаўным сакратаром Яго Святасці кардыналам Тарчызіо Бэртонэ.

3 снежня 2009 г. Святы Айцец Бэнэдыкт XVI сустрэнецца ў Апостальскай Сталіцы з Прэзідэнтам Расіі Дзмітрыем Мядзведзевым. У Маскоўскім Патрыярхаце адзначаюць, што падчас сустрэчы пацвердзіцца супадзенне пазіцый праваслаўных і католікаў па пытаннях грамадскіх адносінаў, хрысціянскай маральнасці і неабходнасці супрацоўніцтва.

23 лістапада 2009 г. Святы Айцец Бэнэдыкт XVI удзяліў аўдыенцыю прэм’ер-міністру Кувейта Шэйху Насіру аль-Мухамеду. Галоўнай тэмай размовы Пантыфіка з дзяржаўным дзеячам Кувейта стала пытанне міру і міжрэлігійнага дыялога на Блізкім Усходзе.

21 лістапада 2009 г. Святы Айцец Бэнэдыкт XVI сустрэўся ў Сікстынскай капэле ў Апостальскай Сталіцы з прадстаўнікамі свету мастацтва. У сувязі з гэтым у чарговым нумары ватыканскага выдання «L’оsservatore Romano» прысвячаецца ўвага заключэнню «новага саюзу» паміж светам мастацтва і Касцёлам.

19 лістапада 2009 г. Святы Айцец Бэнэдыкт XVI сустрэўся з удзельнікамі ХХІІІ сесіі Міжнароднай федэрацыі каталіцкіх універсітэтаў (FIUC), якая адбываецца ў гэтыя дні ў Ватыкане. Пасяджэнне праводзіцца з нагоды 60-гадовага юбілею прызнання Апостальскай Сталіцай статутаў Федэрацыі. Нагодай да сустрэчы стала таксама 30-годдзе абвяшчэння Янам Паўлам ІІ апостальскай канстытуцыі «Sapientia Christiana», якая датычыць касцёльных універсітэтаў.

15 лістапада 2009 г. Святы Айцец Бэнэдыкт XVI удзяліў аўдыенцыю Прэзідэнту Сербіі Борысу Тадзічу. Падчас сустрэчы, як паведаміла агенцтва Zenit, Пантыфік адзначыў пазітыўны напрамак дыялога паміж Каталіцкім Касцёлам і Праваслаўнай Царквой у гэтай краіне.