Урачыстай адпустовай Імшой 5 ліпеня 2014 г. у Нацыянальным санктуарыі завяршылася святкаванне Юбілейнага года 400-годдзя прысутнасці цудатворнага абраза Маці Божай у Будславе. Таксама яна была прысвечана падзяцы Богу за кананізацыю Яна Паўла II. Імшу ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч.

У Будславе ў межах урачыстасцяў, якія праходзяць 4-5 ліпеня, у палатачным гарадку перед моладдзю выступіў гурт «Laudans». Першы канцэрт гурта адбыўся 25 красавіка 2013 года, музыка, якую выконваюць, - рок і блюз. Пачаткова «Laudans» выконвалі спевы на вершы кс. Яна Твардоўскага, на сённяшні дзень — на вершы І. Багдановіч, Яна Паўла II, А. Ючкавіч, а таксама пішуць тэксты самі. «Laudans» у перакладзе з лацінскай азначае «той, хто славіць». Моладзь з розных куткоў Беларусі славіла Пана з радасцю і энтузіязмам.

У межах урачыстасцяў у Нацыянальным санктуарыі Маці Божай Будслаўскай, што праходзяць сёлета 4-5 ліпеня, адбылася святая Імша ўначы, якую ўзначаліў Апостальскі Нунцый у Беларусі арцыбіскуп Клаўдыё Гуджэроцці. Імшы папярэднічала працэсія з копіяй абраза Маці Божай Будслаўскай, у ёй прынялі ўдзел шматлікія пілігрымы, несучы ў руках знічы.

4 ліпеня, у першы дзень урачыстасцяў у Нацыянальным санктуарыі Маці Божай Будслаўскай, адбылася Імша для пілігрымаў, якія прыбылі ў Будслаў з розных дыяцэзій Беларусі. Імшу ўзначаліў біскуп Віцебскі Алег Буткевіч.

4 ліпеня да святой Імшы для пілігрымаў, якая адбылася ў 18 гадзін, у Нацыянальны санктуарый Маці Божай Будслаўскай прыбылі пілігрымы з усіх дыяцэзій Беларусі. Кожную пілігрымку прывітаў кусташ санктуарыя а. Віктар Бурлака OFM. Пілігрымка “Мінск-Будслаў” унесла крыж і абраз Сусветнага дня моладзі, а пілігрымы з Нарачы – рэліквіі святога Яна Паўла ІІ, якія захоўваюцца ў нарачанскім касцёле.

Апостальскі Нунцый у Беларусі арцыбіскуп Клаўдыё Гуджэроцці перадасць футболку з сімволікай пілігрымкі Маладзечна–Будслаў Святому Айцу Францішку. Пра гэта прадстаўнік Папы сказаў пілігрымам падчас сустрэчы з імі 4 ліпеня на шляху ў Будслаў.

Нацыянальны санктуарый Маці Божай Будслаўскай наведала першая ў гэтым годзе пілігрымка — з Глыбокага. 24 пілігрымы, старэйшаму з якіх 59, а малодшаму 15 гадоў, вырушылі ў шлях на роварах 1 ліпеня а 7-й раніцы, пераадолелі 56 кіламетраў. Разам з пілігрымамі ехаў кс. Вячаслаў Пялінак.

2 ліпеня пілігрымка «Мінск-Будслаў» прыйшла ў Альковічы, парафію Адведзінаў Найсвяцейшай Панны Марыі. Шлях да Альковічаў — гэта шлях маляўнічымі сцежкамі і праз поле, і праз лес, які дадае кожнаму пілігрыму новых сілаў і ўражанняў. Вось гэтымі ўражаннямі і дзеляцца пілігрымы з нашымі чытачамі.

30 чэрвеня святой Імшой у 8.00 удзельнікі 24-ай пешай пілігрымкі «Мінск-Будслаў» узнеслі спевы на пачатак свайго «малітоўнага падарожжа», якога чакалі ўвесь год, а ўжо ў 10.00 пасля благаслаўлення Мітрапаліта Тадэвуша Кандрусевіча і шчодрага акраплення святой вадой вырушылі вуліцамі горада ў пяцідзённы шлях.

27 чэрвеня ў Назарэце адбылося ўрачыстае асвячэнне мазаікі абраза Маці Божай Будслаўскай. З гэтай нагоды на Святую Зямлю з Беларусі былі арганізаваныя адмысловыя Усебеларускія пілігрымкі. Першую ўзначальвае Мітрапаліт Тадэвуш Кандрусевіч, другую – дапаможны біскуп Гродзенскай дыяцэзіі Юзаф Станеўскі. Пілігрымы наведаюць Бэтлеем, Назарэт, Гару Благаслаўленняў, Кану, Гару Табор, Ерыхон і Ерузалем.