У парафіі Найсвяцейшага Адкупіцеля ў Гродне адбылася ўрачыстасць з нагоды першага выпуску навучэнцаў «Курсаў сямейнага жыцця». Свята пачалося Імшой, якую ўзначаліў біскуп Гродзенскі Аляксандр Кашкевіч.

На пачатку а. Пётр Фраштэнга OCD, сакратар Рады па справах сям’і пры Канферэнцыі Каталіцкіх Біскупаў у Беларусі, узгадаў гісторыю ўзнікнення курсаў у Гродне ў 2009 годзе.

Біскуп Кашкевіч з нагоды свята Найсвяцейшай Панны Марыі з Лурд і Сусветнага дня хворых адзначыў важнасць і неабходнасць ахвяравання свайго цярпення Богу і хрысціянскай падтрымкі хворых людзей. Шмат цёплых словаў было адрасавана выпускнікам і навучэнцам «Курсаў сямейнага жыцця» з надзеяй на тое, што атрыманыя веды дапамогуць ім у працы ў душпастырствах, і сучасная сям’я вернецца да жыцця па Божым законе.

Напрыканцы біскуп Кашкевіч і кіраўнік курсаў с. Барбара Сайнок уручылі дыпломы і падарункі 14 выпускнікам.

Свята мела працяг за кубкам гарбаты. З пажаданнем добрых ведаў і адзнак біскуп Кашкевіч уручыў усім студэнтам 1 і 2 курсаў заліковыя кніжкі.

Алена Якута, 1 курс