У іўеўскай парафіі Свв. Апосталаў Пятра і Паўла за апошнія гады з’явілася шмат традыцый, якія дапамагаюць парафіянам вызначаць важныя грані жыцця сапраўднага хрысціяніна, узмацняюць веру і жаданне ўдасканальваць сябе. У апошнія выхадныя кс. дэкан Ян Гавецкі арганізаваў для сем’яў парафіі рэкалекцыі.

Сем сем’яў — чатырнаццаць дарослых і пятнаццаць дзяцей — з 11 па 13 мая знаходзіліся ў Сапоцкіне. Час, які мы перажылі разам, адной сям’ёй, прымаючы ўдзел у рэкалекцыях, пакінуў у нашых сэрцах самыя добрыя ўражанні і незабыўныя ўспаміны. Мы мелі магчымасць духоўна ўзбагаціцца падчас сустрэч з біскупам Гродзенскім Аляксандрам Кашкевічам, святарамі, сёстрамі законнымі, з іншымі сем’ямі, цікавымі людзьмі.

Наш дзень пачынаўся з сумеснай малітвы ў прыгожай капліцы, і тут жа ўвечары мы дзякавалі Богу за пражытыя імгненні вялікай радасці адчуваць Божую апеку і ласку. Мы звярталіся да Бога, каб прасіць сардэчнай цеплыні і згоды ў нашых сем’ях, здароўя для нашых дзетак і для дарагіх нашаму сэрцу людзей. Магчыма, некалі на жыццёвай дарозе камусьці з нас успамін аб гэтых рэкалекцыях дапаможа знайсці патрэбныя словы для мужа ці жонкі, сына ці дачкі, стрымаць гнеў, не разбурыць каштоўны мір у сям’і.

За ўсё гэта — за цікавыя экскурсіі, падчас якіх мы наведалі святыні Гродна, Аўгустоўскі канал, іншыя прыгожыя мясціны — і ўвогуле за арганізацыю сямейных рэкалекцый мы вельмі ўдзячны ксяндзу дэкану Яну Гавецкаму, які знайшоў для нас і нашых дзяцей шмат часу, цеплыні і любові.

Сем’і парафіі ў Іўі