27 ліпеня папа Францішак сустрэўся ў гарадскім тэатры Рыа-дэ-Жанэйра з бразільскімі палітыкамі, дыпламатамі, прадстаўнікамі грамадскасці, культуры і буйнейшых рэлігійных супольнасцяў. Пантыфік заклікаў іх берагчы арыгінальнасць культурнай традыцыі Бразіліі, салідарна ствараць будучыню краіны і весці дыялог.

26 ліпеня ў межах свайго візіту ў Бразілію Папа спавядаў моладзь у парку «Боа-Віста». На споведзь да Пантыфіка прыйшлі пяць маладых людзей.

Вечарам 26 ліпеня Святы Айцец Францішак прыняў удзел у набажэнстве Крыжовага шляху з маладымі вернікамі, сабранымі на Сусветным дні моладзі ў Рыа-дэ-Жанэйра. На заканчэнне набажэнства Папа звярнуўся да моладзі са словам.

«Я б хацеў, каб мой візіт у Рыа абнавіў ува ўсіх любоў да Хрыста і Касцёла, радасць быць злучанымі з Ім і належаць Касцёлу, а таксама абавязак жыць верай і сведчыць аб ёй», — сказаў Святы Айцец Францішак у разважанні перад малітвай «Анёл Панскі» 26 ліпеня. Папа прыняў удзел у малітве, якая адбылася перад архідыяцэзіяльнай курыяй Рыа-дэ-Жанэйра.

Папа Францішак вырашыў уключыць у праграму свайго удзелу ў Сусветным дні моладзі сустрэчу са зняволенымі. Яна адбудзецца ў архідыяцэзіяльнай курыі Рыа-дэ-Жанэйра.

25 ліпеня Святы Айцец Францішак сустрэўся з моладдзю на пляжы Копакабана ў Рыа-дэ-Жанэйра. Едучы ў папамабілі, Пантыфік вітаў сабраных, а пасля звярнуўся да іх са сваім словам.

25 ліпеня ў межах свайго прабывання ў Бразіліі Святы Айцец Францішак наведаў фавэлы (трушчобы) Варжынья. Звяртаючыся да іх жыхароў, Папа прызнаўся, што яго жаданнем было «наведаць усе раёны гэтай краіны», і ён хацеў бы «пастукацца ў кожныя дзверы, сказаць „добры дзень“, папрасіць шклянку халоднай вады, выслухаць сэрца кожнага».

Папа Францішак маліўся за загінуўшых і параненых у буйной чыгуначнай аварыі каля Санц’яга-дэ-Кампастэла. Пантыфік, які знаходзіцца ў Бразіліі, быў паінфармаваны аб аварыі і выказаў глыбокі смутак.

Папа Францішак заклікаў да мужнай барацьбы з незаконным абаротам наркотыкаў у Лацінскай Амерыцы, падкрэсліўшы, што гэта зло, якое выклікае насілле, боль і смерць, і таму патрэбны адважныя крокі для яго знішчэння з боку ўсяго грамадства. 24 ліпеня Пантыфік наведаў клініку імя св. Францішка Асізскага ў Рыа-дэ-Жанэйра, якая спецыялізуецца на лячэнні людзей з залежнасцямі, перш за ўсё наркаманаў.

Папа Францішак 24 ліпеня ў межах візіту ў Бразілію наведаў санктуарый Маці Божай у Апарэсідзе. Пантыфік адзначыў, што гэтае месца мае для яго важнае значэнне, паколькі менавіта тут нарадзіўся «Дакумент з Апарэсіды», які «паўстаў са спляцення сустрэчы біскупаў і простай веры пілігрымаў, пад матчынай апекай Марыі». Святы Айцец узначаліў у санктуарыі Імшу.

24 ліпеня Святы Айцец Францішак звярнуўся да моладзі праз «Твітэр» з новым запісам. «Дарагія юнакі і дзяўчаты, Хрыстус верыць у вас і даручае вам сваю місію: ідзіце і навучайце!» — так гучаць словы Папы.

Старшыня Прэс-службы Апостальскай Сталіцы кс. Фэдэрыко Ламбардзі паведаміў аб некаторых зменах праграмы візіту Святога Айца ў Бразілію. У прыватнасці, да праграмы прабывання Папы ў Рыа-дэ-Жанэйра была дададзена адна сустрэча: 25 ліпеня пасля вяртання з мікрараёну Варжынья, дзе знаходзяцца фавэлы (трушчобы), Пантыфік сустрэнецца ў архікатэдры з бразільскай моладдзю.

Папа Францішак 25 ліпеня сустрэнецца ў Рыа-дэ-Жанэйра з легендамі і зоркамі бразільскага футбола. Раніцай у чацвер Пантыфік благаславіць афіцыйныя сцягі Алімпійскіх і Паралімпійскіх гульняў, якія пройдуць у Рыа ў 2016 г.

Мэта паездкі ў Бразілію — сустрэча з маладымі людзьмі, якіх нельга ізаляваць; ім трэба дапамагаць вырашаць цяжкасці кожнага дня, а таксама праблемы, звязаныя з працай, — нагадаў папа Францішак журналістам падчас палёту на Сусветны дзень моладзі. Пантыфік звярнуўся да прадстаўнікоў СМІ ў самалёце.

«Дзякуй усім вам і ўсім уладам за цудоўны прыём у Рыа», — такія словы былі змешчаны ў профілі Святога Айца ў «Твітэры» 23 ліпеня. Учора Пантыфік прыбыў у Рыа-дэ-Жанэйра.