Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
У Полацку адбыўся летнік для людзей з асаблівасцямі псіхафізічнага развіцця і валанцёраў
Грэка-Каталіцкая Царква
26.07.2012 11:22

Грэка-каталіцкая парафія Cвятамучаніка Язафата ў Полацку з 16 па 22 ліпеня праводзіла летнік для людзей з абмежаваннямі псіхафізічнага развіцця і валанцёраў. Мерапрыемства было арганізавана хрысціянскім валанцёрскім рухам св. Мікалая.

Назва летніка была незвычайнай і нават інтрыгуючай: «Касмічны злёт недаследаваных вандруючых планет 2” 012’». А галоўнай мэтай летніка было навучыцца бачыць і пазнаваць іншага чалавека такім, якім ён ёсць, яго ўнутраны свет, думкі і прагненні.

Кожны з удзельнікаў быў іншапланецянінам, адзіным прадстаўніком сваёй нікім не даследаванай планеты. Яго заданнем было раскрыцца і данесці іншым удзельнікам усю прыгажосць і непаўторнасць свайго свету, у той час як іншыя мелі магчымасць пазнаваць веліч і загадкавасць Сусвету, створанага Богам. Былі на летніку і прадстаўнікі планет з малой гравітацыяй. Яны былі непрыстасаваныя да зямной гравітацыі, таму, каб ім самастойна перамяшчацца, былі патрэбны спецыяльныя прыстасаванні — касмічныя каляскі, але гэта рабіла іх яшчэ больш цікавымі і загадкавымі.

Праграма летніка была спакойнай і мела характар адпачынку. Гэта быў час, калі ўдзельнікі маглі выйсці за межы сваіх штодзённых клопатаў і памкненняў, спыніцца і проста пражыць дзень; калі было дастаткова вольнага часу, каб пабачыць каля сябе яшчэ і іншага чалавека, яго цікавы і непаўторны ўнутраны свет, яго клопаты і памкненні.

Арганізатары летніка выказваюць асаблівую удзячнасць а. Яну з грэка-каталіцкай парафіі Уваскрасення Хрыстова (г. Антверпен) і Вікторыі Ясіновіч, якая прадстаўляла на летніку грэка-католікаў Бельгіі, за салідарнасць і падтрымку. Таксама арганізатары шчыра дзякуюць сястры Валянціне Арсобе — пастаяннай сяброўцы летніка за транспартную дапамогу.

Асаблівая падзяка а. Аляксандру Шаўцову — пробашчу грэка-каталіцкай парафіі ў Полацку і ўсім парафіянам за гасціннасць і арганізацыйную дапамогу.
 
А. Аляксандр Шыбека

Фотарэпартаж
 

Пры выкарыстанні матэрыялаў сайта спасылка на Catholic.By абавязкова.

Спасылкі па тэме