Што такое дзіцячае шчасце? Гэта ўсмешкі, сэрцы, запаленыя верай да Бога, радасцю, шчырасцю, дабрынёй, любоўю, павагай, сілай волі. Усяго гэтага дасягнулі за два тыдні у парафіях Св. Тэрэзы Авільскай у Шчучыне і Унебаўзяцця Найсвяцейшай Панны Марыі ў Лідзе дзякуючы айцам піярам, якія правялі там «Канікулы з Богам».

Кожны дзень канікул быў добра арганізаваны. Праводзіліся гутаркі па тэме дня, малітвы, песні, гульні, вясёлыя танцы, у якіх удзельнічалі як самыя маленькія, так і старэйшыя. Таксама дзеці прымалі ўдзел у конкурсе малюнкаў на асфальце, у спартыўных спаборніцтвах, за што атрымалі прызы. Дзень завяршаўся малітвай і спевамі, у якіх дзякавалі Богу за праведзены час.

Ва ўсім ходзе мерапрыемства адчувалася дапамога семінарыстаў, моладзі, якія калісьці ўдзельнічалі ў падобных сустрэчах і разумеюць радасць, якую атрымліваюць дзеці ад іх. Яны прыклалі нямала намаганняў для падтрымкі і арганізацыі гэтых святочных дзён.

Падзякаваць айцам піярам за цеплыню і ласку мы змаглі ў дзень іх заснавальніка святога Юзафа Каласанса, які адзначаўся 25 жніўня.

Усе ўдзельнікі атрымалі сапраўднае задавальненне ад «Канікул з Богам». Будзем чакаць наступнага года для таго, каб зноў перажыць тую радасць, ласку і глыбокія перажыванні, якія можна атрымаць разам пад апекай Пана Бога.

Марыя Васюк