2 лістапада 2012 г., ва ўспамін усіх памерлых вернікаў, пробашч гомельскай парафіі Нараджэння Божай Маці кс. Славамір Ласкоўскі і некалькі дзясяткаў вернікаў маліліся каля крыжа на 9-м кіламетры ў горадзе, дзе былі калісьці расстраляны ахвяры таталітарнага рэжыму.

Як паведамляе сайт гомельскай парафіі, святар і вернікі маліліся таксама за тых, хто ўдзельнічаў у рэпрэсіях, і за тых, хто пераследаваў хрысціян.

Па словах кс. Ласкоўскага, гэтае месца з’яўляецца «святым, сімвалічным для Гомеля». «У Беларусі падчас сталінскіх рэпрэсій былі забіты дзясяткі тысяч людзей, у тым ліку і на 9-м кіламетры ў Гомелі, — адзначыў святар. — Многія святары і вернікі загінулі на Салаўках. Дзякуючы іх ахвярам мы сёння маем магчымасць быць у Касцёле».

Пробашч гомельскай парафіі дадаў, што «мы прыходзім сюды, каб аддаць даніну павагі тым, хто не баяўся да канца ісці за Хрыстом, не баяўся, што можа памерці».

Ва ўспамін памерлых вернікаў за ўсіх беларусаў, якія сталі ахвярамі войнаў і пераследу, маліўся падчас святой Імшы ў мінскім касцёле свв. Сымона і Алены і Апостальскі Нунцый у Беларусі арцыбіскуп Клаўдыё Гуджэроцці. А ў першай палове дня 2 лістапада прадстаўнік Святога Айца маліўся за тых, хто загінуў падчас вайны і рэпрэсій, у мемарыяльным комплексе «Трасцянец» і ва ўрочышчы Курапаты.

(AG)