З самай раніцы 25 снежня ў касцёл св. Антонія Падуанскага і Беззаганнага Зачацця Найсвяцейшай Панны Марыі ў Паставах прыходзілі вернікі разам з дзецьмі, каб прывітаць нованароджанага Збаўцу — Езуса Хрыста.

У парафіян быў радасны настрой, яны віншавалі адзін аднаго са святам Божага Нараджэння. Але, напэўна, найбольш радаснай гэтая святая Імша была для дзяцей.

На працягу ўсяго Адвэнту дзеці і моладзь пастаўскай парафіі прыходзілі на раратнюю святую Імшу, якая пачыналася ў 6.45 раніцы. А пасля заканчэння святочнай літургіі 25 снежня ўсе яны атрымалі падарункі. З вялікай радасцю малодшыя вернікі ішлі дадому, каб святкаваць разам з сям’ёй гэтае адно з самых найцудоўнейшых святаў.

Жанна Аўдасевіч