З 11 красавіка ў палацы Румянцавых і Паскевічаў у Гомелі дзейнічае выстава «Светлае Хрыстова Уваскрасенне», прымеркаваная да Вялікадня. Упершыню ў Гомелі выставяць працы мастачкі Алены Гордан, якая працуе ў тэхніцы мінеральнага россыпу.

11 красавіка ў капліцы душпастырскага цэнтра грэка-каталіцкай парафіі Праведнага Язэпа ў Мінску была адслужана Літургія і паніхіда за супакой душы Рыгора Барадуліна з нагоды 40-га дня пасля смерці. Затым грэка-каталіцкі Клуб інтэлігенцыі імя св. Кірылы Тураўскага запрасіў удзельнікаў на вечар духоўнай паэзіі Рыгора Барадуліна.

10-11 красавіка ў Мінску адбыўся ІІ Рэспубліканскі сацыяльны форум “Сацыяльная згуртаванасць у імя ўсеагульных інтарэсаў”. У форуме ўдзельнічалі прадстаўнікі заканадаўчай і выканаўчай уладаў, грамадскіх арганізацый, бізнес-супольнасцяў, а таксама прадстаўнікі дабрачыннага каталіцкага таварыства “Карытас”.

Перад велікоднымі святамі 5 красавіка ў катэдральным касцёле Унебаўзяцця Найсвяцейшай Панны Марыі і св. Станіслава ў Магілёве адбылася сустрэча моладзі Магілёўшчыны пад дэвізам “Маліцеся і чувайце”.

11 красавіка ў грэка-каталіцкім Цэнтры святога Язэпа адбудзецца літургія з паніхідай у памяць аб народным паэце Беларусі Рыгору Барадуліну.

6 красавіка біскуп Віцебскі Алег Буткевіч удзяліў сакрамэнт канфірмацыі вернікам парафіі Святога Духа ў Віцебску. Сённяшні біскуп, які з 2003 года нёс святарскае служэнне ў Віцебску, добра ведае парафію і, у сваю чаргу, вядомы парафіянам, а ў якасці ардынарыя наведаў гэты касцёл упершыню.

У 2013 г. вілейскі касцёл Узвышэння Святога Крыжа адзначаў 100-гадовы юбілей, і гэтай нагоды з 3 па 10 сакавіка мінулага года праходзілі парафіяльныя місіі. 3-6 красавіка 2014 г. адбывалася аднаўленне місій. У парафію зноў завіталі айцы місіянеры Дзмітрый Занямонскі з Мінска і Анджэй Юхневіч з Шуміліна.

5 красавіка мінская грэка-каталіцкая парафія Праведнага Язэпа прымала чаканых гасцей – людзей з асаблівасцямі псіха-фізічнага развіцця з віцебскага клуба “Бэтэль”.

З 27 па 29 сакавіка ў івянецкім кляштары супольнасці Братоў Меншых Канвентуальных юнакі з Гродна, Каменя, Івянца і Мінска ўдзельнічалі ў вясновых рэкалекцыях «Дрэва жыцця», якія арганізавалі францішкане.

У парафіі Маці Божай Шкаплернай у Мядзелі пачынаюць аднаўляць “Беларускую кальварыю” – 14 капліц, якія сімвалізуюць Крыжовы шлях Езуса Хрыста. Гэта духоўная і культурная каштоўнасць, якіх некалькі ў свеце, а ў Беларусі яна адзіная.

З 31 cакавіка па 3 красавіка ў Еўрапейскім цэнтры камунікацыі і культуры ў Варшаве (Польшча), які ўзначальваюць айцы езуіты, адбыўся семінар на тэму, як паводзіць сябе з мас-медыя ў крызісных сітуацыях. На семінары, арганізаваным Канферэнцыяй Біскупаў ЗША і Еўрапейскім цэнтрам камунікацыі і культуры, Беларусь прадстаўлялі Мітрапаліт Мінска-Магілёўскі арцыбіскуп Тадэвуш Кандрусевіч, старшыня ККББ біскуп Гродзенскі Аляксандр Кашкевіч і біскуп Пінскі Антоні Дзям’янка.

У араторыі імя св. Яна Боско пры мінскай парафіі Св. Яна Хрысціцеля былі арганізаваны вясновыя канікулы для дзяцей, якія працягваліся тыдзень. Разам з законнай сястрой Люцыяй, аніматарамі і памочнікамі аніматараў дзеці разважалі ў ходзе канікул над тэмай “Давід – Божы выбраннік”.

10 мая ў Каталіцкім моладзевым цэнтры імя св. Яна Боско ў Мінску адбудзецца турнір св. Дамініка Савіо па мікра-футболе.

28-30 сакавіка ў мінскай парафіі Узвышэння Святога Крыжа на Кальварыі адбыліся велікапосныя рэкалекцыі. Правёў іх ксёндз Андрэй Яркавец, пробашч парафіі Унебаўзяцця Найсвяцейшай Панны Марыі ў Красным.