20–21 ліпеня 2012 г. у Мядзелі, дзе працуюць айцы кармэліты, адбылося святкаванне ўспаміну Маці Божай Шкаплернай. Распачалося яно набажэнствам Крыжовага шляху, у якім удзельнічаў дапаможны біскуп Пінскай дыяцэзіі Казімір Велікаселец.

Як адзначыў біскуп, у гэтым месцы ён перажыў сапраўдны Крыжовы шлях Езуса. У гаміліі іерарх заклікаў вернікаў адгукнуцца на словы Марыі, якія яна скіроўвала да людзей падчас сваіх аб’яўленняў. Марыя, па словах біскупа, пастаянна просіць аб навяртанні, заахвочвае да малітвы, посту, пакаяння і чыстасці.

Падчас святой Імшы на мядзельскай Кальварыі быў удзелены сакрамэнт канфірмацыі.

У суботу, 21 ліпеня, свята працягнулася святочнай Імшой, якую ўзначаліў пробашч свірскай парафіі. Гамілію прамовіў кс. Павел Рудзьман. Святар распавёў аб цудах, учыненых Маці Божай Шкаплернай у яго ўласным жыцці. Падчас літургіі быў удзелены сакрамэнт хросту.

Урачыстасць завяршылася святочнай працэсіяй вакол касцёла.

Варта адзначыць, што жыццё мядзельскай парафіі само па сабе нагадвае Крыжовы шлях. Яно поўнае перашкод і спакусаў. Доўгі час у парафіі не было пастаяннага пробашча. Зараз тут ужо некалькі гадоў працуюць айцы кармэліты а. Павел Леліта (пробашч), а. Юрый Кулай, бр. Андрэй, вядзецца актыўная рэканструкцыя Кальварыі, рамонт касцёла, будуецца кляштар. Парафія патрабуе не толькі матэрыяльных сродкаў, але і духоўнай падтрымкі, руплівай малітвы.