2 лютага 2009 г. было абнародавана Пасланне Святога Айца на Вялікі пост, прысвечанае сэнсу і каштоўнасці посту. Бэнэдыкт XVI заахвочвае парафіі і касцёльныя супольнасці да аднаўлення індывідуальнага і супольнага практыкавання посту праз слуханне і чытанне Божага слова, малітву і ўчынкі міласэрнасці.
Цярпенні і хваробы дзяцей, а таксама сітуацыя іх сем’яў — галоўныя тэмы Паслання Святога Айца на ХVІІ Сусветны Дзень хворага, які з 1993 г. па традыцыі адзначаецца 11 лютага. Ініцыятарам гэтага дня быў Папа Ян Павел ІІ. Звычайна Дзень хворага адзначаўся ў марыйных санктуарыях у розных кутках свету, а ў гэтым годзе яго святкаванне мае дыяцэзіяльны характар.
Працягваць аказваць дапамогу Афрыцы, наладжваць партнёрскія адносіны і вырашыць існуючыя канфлікты — да гэтага заклікаў кардынал Тарчызіо Бэртонэ падчас сустрэчы з пасламі еўрапейскіх краінаў, якая адбылася 10 лютага 2009 г. у Апостальскай Сталіцы.
11 лютага 2009 г. Горад Дзяржава Ватыкан будзе святкаваць 80-годдзе з дня свайго заснавання. Дзяржава Ватыкан заснавана ў выніку Латэранскіх пагадненняў, якія былі заключаны паміж Апостальскай Сталіцай і Італіяй 11 лютага 1929 г. і ратыфікаваны 7 чэрвеня 1929 г. 
Пра сэнс і каштоўнасць хваробы ў кожнай сітуацыі чалавечага жыцця разважаў Бэнэдыкт XVI падчас малітвы «Анёл Панскі» 8 лютага 2009 г. Святы Айцец адзначыў, што, хоць хвароба з’яўляецца часткаю чалавечага жыцця, да яе, аднак, немагчыма прызвычаіцца. І не толькі таму, што часам хвароба цяжкая і сур’ёзная, але перш за ўсё таму, што чалавек створаны для жыцця.
Старшыня Папскай рады «Cor Unum» кардынал Паўль Ёзаф Кордэс перасцерагае ад моднага культу цела, які мае выраз у велізарных сумах, якія выдаткоўваюцца на гэтую мэту. Падчас прэзентацыі сёлетняга велікапоснага паслання Бэнэдыкта XVI, кардынал Кордэс заклікаў да адкрыцця глыбокага сэнсу хрысціянскага посту.
«Прыклад і вучэнне святога можа быць імпульсам і нават гарантыяй узмацнення хрысціянскай самасвядомасці кожнага з нас, а таксама амаладжэння ўсяго Касцёла», — адзначыў Бэнэдыкт XVI падчас агульнай аўдыенцыі ў Ватыкане 4 лютага 2009 г. У гэты дзень Святы Айцец завяршыў цыкл катэхезаў, прысвечаных асобе Апостала Народаў.
2 лютага 2009 г. было абнародавана Пасланне Святога Айца на Вялікі пост, прысвечанае сэнсу і каштоўнасці посту. Бэнэдыкт XVI заахвочвае парафіі і касцёльныя супольнасці да аднаўлення індывідуальнага і супольнага практыкавання посту праз слуханне і чытанне Божага слова, малітву і ўчынкі міласэрнасці.
Святы Айцец Бэнэдыкт XVI скіраваў ліст да Патрыярха Маскоўскага і ўсяе Русі Кірыла І з нагоды яго інтранізацыі, якая адбылася 1 лютага 2009 г. у Маскве. Ліст Пантыфіка перадаў новаабранаму Патрыярху старшыня Папскай рады спрыяння хрысціянскаму адзінству кардынал Вальтэр Каспер.
«Наследванне святога Паўла ў крочанні за Хрыстом — гэта надзейны шлях адказу на пакліканне да святарскага і манаскага жыцця», — з такімі словамі звярнуўся Бэнэдыкт XVI да ўдзельнікаў святой Імшы ў свята Ахвяравання Пана і XIII Дзень кансэкраванага жыцця.
«Няхай ваша прысутнасць у Расіі будзе напамінам і заклікам да дыялога», — звярнуўся Бэнэдыкт XVI да біскупаў Расіі, якія знаходзяцца ў Рыме з візітам ad limina. Папа прыняў кожнага з іерархаў на прыватных аўдыенцыях, а 29 студзеня 2009 г., у перадапошні дзень візіту, сустрэўся з усім епіскапатам.
Святы Айцец Бэнэдыкт XVI перасцерагае Трыбунал Рымскай Роты ад неабдуманага сцвярджэння, што сужэнства з’яўляецца несапраўдным па прычыне псіхічнай няздольнасці аднаго з бакоў выконваць сужэнскія абавязкі. У штогадовай аўдыенцыі для гэтага ватыканскага ведамства Пантыфік узняў праблему, якую 20 гадоў таму закранаў Ян Павел ІІ.
«Год астраноміі з’яўляецца для Апостальскай Сталіцы каштоўнай нагодай для паглыблення дыялога», — адзначана ў афіцыйным паведамленні, абнародаваным падчас прэзентацыі ў прэс-службе Ватыкана ініцыятываў, звязаных са святкаваннем Года астраноміі. У сустрэчы прымалі ўдзел старшыня Папскай рады па культуры арцыбіскуп Джанфранко Равасі, дырэктар Ватыканскай астранамічнай абсерваторыі кс. Жазэ Габрыэль Фунэс, прэзідэнт Папскай акадэміі навук прафесар Нікаля Кабіббо.
1 лютага 2009 г. старшыня Папскай рады спрыяння хрысціянскаму адзінству кардынал Вальтэр Каспер накіруецца ў Маскву на ўрачыстую інтранізацыю новаабранага Патрыярха Маскоўскага і ўсяе Русі Кірыла. Па словах старшыні ватыканскага ведамства, у жыцці Рускай Праваслаўнай Царквы пачынаецца новы этап, які вызначыць новыя прасторы міжканфесійнага дыялога.
Пра крызіс бацькоўства, які ўсё больш распаўсюджваецца ў сённяшнім свеце, выказаўся кардынал Паўль Ёзаф Кордэс — старшыня Папскай рады «Cor Unum». Спасылаючыся на рапарт каталіцкіх дабрачынных арганізацый, кардынал звярнуў увагу на тое, што, напрыклад, у ЗША 24 мільёны дзяцей жывуць без бацькі (у параўнанні з 10 мільёнамі ў 60-ыя гады XX ст.).
Ватыканскае радыё