25 мая ў парафіі Св. Антонія ў Мар’інай Горцы на ўрачыстасці Першай Камуніі, якую прынялі восем дзяцей, прысутнічала жанчына, якая сваю Першую Камунію прыняла ў ваенны 1943 год. Прысутнасць Леакадзіі Зенко стала сведчаннем веры і адданасці Богу, якую яна змагла пранесці праз усё жыццё і зараз быць прыкладам для наследвання.

25 мая, у VI Велікодную нядзелю, у Барысаве была асвячана капліца і вуглавы камень для будоўлі новага касцёла Спаслання Святога Духа. Асвячэнне здзейсніў Мітрапаліт Мінска-Магілёўскі арцыбіскуп Тадэвуш Кандрусевіч.

22 мая сакратар Кангрэгацыі Евангелізацыі Народаў арцыбіскуп Савіо Хон Тай-Фай SDB, які прыбыў у Беларусь на сімпозіум з нагоды 25-годдзя служэння салезіянскай супольнасці ў Смаргоні, узначаліў Імшу ў мінскім архікатэдральным касцёле. У Імшы прынялі ўдзел Апостальскі Нунцый у Беларусі арцыбіскуп Клаўдыё Гуджэроцці, Мітрапаліт Мінска-Магілёўскі арцыбіскуп Тадэвуш Кандрусевіч, святары і вернікі Мінска.

21 мая ў парафіі Святой Тройцы ў Радашковічах адбылася сустрэча духавенства і кансэкраваных асобаў Мінска-Магілёўскай архідыяцэзіі. Сустрэчу і Імшу ў яе межах узначаліў Мітрапаліт Мінска-Магілёўскі арцыбіскуп Тадэвуш Кандрусевіч.

Пятая велікодная нядзеля, 18 мая, з’яўляецца першым днём існавання ў парафіі Св. Міхала Арханёла ў Гатаве мужчынскай ружанцовай ружы.

18 мая 2014 г., у 94-ю гадавіну нараджэння св. Яна Паўла ІІ, у мінскім архікатэдральным касцёле Імя Найсвяцейшай Панны Марыі адбылася Імша падзякі за яго кананізацыю. Імшу ўзначаліў Апостальскі Нунцый у Беларусі арцыбіскуп Клаўдыё Гуджэроцці.

18 мая касцёл Маці Божай Ружанцовай у Ракаве адзначаў 110-годдзе пачатку яго будаўніцтва. Імшу ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч. На пачатку былі асвячаны новыя алтар, лаўкі, канфесіяналы і вокны. Таксама падчас Імшы Мітрапаліт удзяліў сакрамэнт канфірмацыі 50 парафіянам.

10 мая ў каталіцкім моладзевым цэнтры імя св. Яна Боско ў Мінску адбыўся турнір св. Дамініка Савіо па мікра-футболе сярод юнакоў ва ўзросце 12-15 гадоў. У турніры прынялі ўдзел прадстаўнікі каманд парафіі Імя Найсвяцейшай Панны Марыі ў Мінску, парафіі Св. Міхала Арханёла ў Смаргоні, парафіі Марыі Успамогі Хрысціянаў у Бараўлянах, парафіі Беззаганнага Зачацця Маці Божай у Мінску, парафіі Св. Андрэя Баболі ў Полацку і гаспадары поля – парафіі Св. Яна Хрысціцеля ў Мінску.

11 мая ў парафіі Унебаўзяцця Найсвяцейшай Панны Марыі ў Дзераўной адбылася ўрачыстая Імша ў 100-ю гадавіну нараджэння кс. прэлата Люцыяна Хмялёўца - Генеральнага вікарыя Мінска-Магілёўскай архідыяцэзіі, шматгадовага пробашча гэтай парафіі. Імшу ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч, канцэлебраваў яе біскуп Пінскі Антоні Дзям'янка. Таксама падчас Імшы каля 120 вернікаў прынялі сакрамэнт канфірмацыі.

4 мая ў парафіі Святога Андрэя, апостала, у Нарачы (Мінска-Магілёўская архідыяцэзія) Апостальскі Нунцый у Беларусі арцыбіскуп Клаўдыё Гуджэроцці ўзначаліў Імшу-падзяку за кананізацыю Папы Яна Паўла ІІ. Кананізацыя адбылася 27 красавіка ў Ватыкане.

У мінскай парафіі Маці Божай Ружанцовай у Лошыцы адбыўся VІІІ дзіцяча-моладзевы фестываль мастацкай творчасці «Лошыца 2014». Імпрэза прайшла 27 красавіка, у нядзелю Божай Міласэрнасці і была прысвечана ўрачыстасці далучэння да ліку святых Яна Паўла ІІ.

27 красавіка ў Магілёве, у парафіі Унебаўзяцця Найсвяцейшай Панны Марыі адбылася сустрэча Клуба Каталіцкай Інтэлігенцыі з маладдзю з нагоды далучэння да святога алтара Пана двух Папаў: Яна ХХІІІ і Яна Паўла ІІ.